Анастасија Богдановски и машкиот штафетен тим поставија нови државни рекорди на 13. Светско првенство во кратки базени (25 метри) во Канада. Македонскиот знаменосец на Игрите во Рио де Жанеиро го подобри, досега, најдоброто национално време (26,48 секунди) во трките на 50 метри слободно. Две должини на базенот во Онтарио, Богдановски ги преплива за 26,08 секунди што ѝ донесоа 707 ФИНА поени и 48 место во генералниот пласман во конкуренција на 113 натпреварувачки.
Светскиот рекорд (23,24 секунди) е сопственост на Холанѓанката Раноми Кромовидјојо од СП во Ајндховен во 2013 година.
Македонски рекорд во претпоследниот натпреварувачки ден на 13. СП во пливање во кратки базени собори и машката штафета на 4х50 метри мешано. Марко Блажевски, Љупчо Ангеловски, Горазд Чепишевски и Дамјан Петровски оствари време од 1:42,65 минути што е за нешто повеќе од 11 секунди подобар резултат од оној што е запишан зад АПК „Студент“ (1:53,69 минути). Нивното остварување во севкупниот редослед ги смести на 15 позиција од 17 штафетни состави колку што беа рангирани.
Најдоброто планетарно остварување (1:30,51 минути) во оваа дисциплина е на бразилските пливачи кои го поставија на СП во Доха во 2014 година.