Фото: Фокус
Членови и симпатизери на ВМРО ДПМНЕ од неколку градови, на социјалните мрежи најавуваат протести, за како што велат „да ја чуваат победата на изборите од ДИК“. Стотина членови на ВМРО-ДПМНЕ во моментот се собрани пред партискиот штаб во центарот на Битола. Улицата пред хотелот „Епинал” е блокирана, а се зголемува и присуството на полицијата, објави Фокус.
Членовите на партијата не кажуваат зошто се собрани, но некои од нив коментираат дека се излезени за да ја „чуваат победата ”, од Државната изборна комисија.
Во исто време, членови на ВМРО ДПМНЕ на социјалните мрежи најавија дека во 16:30 часови ќе се соберат на протест пред ДИК. Но, протестот кој беше најавен од Велес, не успеа откако ДИК ја откажа седницата закажана за попладне. Таму во моментот има само неколку луѓе.
На социјалните мрежи, неколку јавни личности кои ја поддржуваат партијата ВМРО-ДПМНЕ ги повикаа своите поддржувачи да се соберат пред зградата на ДИК во 16:30 часот. Тие упатија повик до нив да не дозволат одлука со која може да се променат резултатите во корист на оваа партија.
ДИК требаше да одржи седница на која ќе се дискутираат приговорите кои ги поднесоа дел од партиите кои обвинија на изборни нерегуларности. Седницата е презакажана за утре, но времето не е однапред најавено.
Протест од членови на ВМРО ДПМНЕ имаше пред ДИК и во моментот кога беа соопштувани првите прелиминарни резултати од изборите. Членовите кои протестираа го извикуваа името на нивната партија и ја реметеа прес конференцијата и работата на Државната изборна комисија.