Голот од пенал што го постигна во втората минута во мечот со Словенија беше 1.000 за Кире Лазаров во дресот на репрезентација на Македонија на Европските првенства, на Светските првенства и во квалификациите за нив. Во повеќе од дводецениските настапи за националниот тим има и преку 200 гола во пријателски средби. Капитенот пристигна на мундијалот во Франција со 977 погодоци.
Лазаров воедно е убедлив лидер на листата на стрелци на Светското првенство со 31 гол. Против Тунижаните на стартот постигна 12, против Анголците во второто коло запиша 10 и против Словенците во третото коло уште девет.
Пред „црвено-жолтите“ се најмалку уште два меча на турнирот. Утревечер против Шпанија и во четврток попладне против Исланд по што ќе следува поделба на репрезентациите на оние што ќе играат во главната нокаут фаза и на оние кои ќе продолжат во т.н. „Претседателски куп“ за пласман од 16 до 24 место во вкупниот пласман.
Сите тие ќе бидат прилика за Лазаров за дополнителен голгетерски ефект и во репрезентативното досие и во трката за најдобар стрелец на СП 2017. Таков епитет веќе има зад себе од СП 2009 во Хрватска на кое реализира 92 погодока во девет натпревари. Беше најефикасен и на Европското првенство во Србија во 2012 година што го заврши со 61 гол на седум средби. Во октомври во 2015 година стана и прв ракометар во историјата на Лигата на шампиони со преку 1.000 реализации. Четирицифрената граница ја проби во дресот на Барселона против ПИК Сегед.
Листа на стрелци
Кире Лазаров (Македонија) 31 гол, Артсем Каралек (Белорусија) 23, Амин Банур (Тунис) 19, Усама Буганми (Тунис) 18, Лука Циндриќ (Хрватска) 18, Серџо Авелино Лопез (Ангола) 18, Хозе Гилерме Толедо (Бразил) 18, Јери Толбринг (Шведска) 18, Кристијан Бјорнсен (Норвешка) 17, Ервин Фојхтман (Чиле) 17, итн.
СП во ракомет
Група А, 3. коло
Полска – Русија 20:24
Франција – Норвешка 31:28
Бразил – Јапонија 27:24
Табела: Франција 6, Русија 4, Норвешка 4, Бразил 4, Полска 0, Јапонија 0
Група Б, 3. коло
Шпанија – Ангола 42:22
Словенија – Македонија 29:22
Исланд – Тунис 22:22
Табела: Шпанија 6, Словенија 6, Македонија 4, Исланд 1, Тунис 1, Ангола 0
Група Ц, 3. коло
Хрватска – Белорусија 31:25
Унгарија – Чиле 34:29
Група Д, 3. коло
Данска – Шведска 27:25
Египет – Бахреин 31:29