Фенербахче триумфира против Галатасарај со 85:80 во најновата евролигашка пресметка за Истанбул и со 13 победи, колку што има и Олимпијакос, но и слаба кош разлика е на четвртото место на табелата по 20. кола.
Градските ривали имаа по едно полувреме во средбата. Галатасарај беше подобар ривал во првите два периода (27:19, 27:22), третиот и четвртиот минаа во знак на Фенербахче (23:12, 23:14) за целосен резултатски пресврт и голема радост на крајот.
Македонскиот интернационалец Перо Антиќ не успеа да се запише меѓу стрелците. Во 12 минути на теренот имаше еден непрецизен обид за тројка, по еден скок и загубена топка и две асистенции.
Најмногу поени за екипата на Жељко Обрадовиќ постигна Јан Весели (20), Боби Диксон уфрли 17, меѓу поразените најефикасен беше Блејк Шилд со 21 поен.
Црвена Звезда во Белград го порази Панатинаикос со 72:65, а Макаби во Тел Авив беше подобар од Уникс Казан со 60:52.