Иран го забрани учеството на борачите од САД на претстојниот Светски куп во слободен стил во градот Керманшах. Ваквата одлука на иранската Влада следува по наредбата на новоизбраниот американски претседател Доналд Трамп за забрана за издавање на визи за државјани од седум муслимански држави.
Агенцијата „ИРНА“ го пренесува портпаролот на иранското министерство за надворешни работи кој потврди дека посебна комисија го разгледувала случајот на боречкиот тим на САД и дека се противи на негово доаѓање во земјата. Одлуката доаѓа како прва мерка на властите во Иран по извршната наредба на Трамп за воведување на тримесечна забрана за издавање на дозволи за влез во Соединетите американски држави на граѓани од Сирија, Ирак, Иран, Јемен, Либија, Сомалија и Судан.
Портпаролот додаде дека политика на новата администрација во Белата куќа не оставила друг избор освен овој да донесе забрана за борачите од САД да допатуваат во Иран.
Светскиот куп во Керманшах е на 16 и 17 февруари. Боречката федерација на САД најави дека ќе испрати свој тим на Светскиот куп во Иран што важи за еден од најпрестижните натпреварувања во тој спорт.
Американците се присутни на турнирот во Иран од 1998 година, а иранските борачи се натпреваруваат во САД од 1990 година.