Нова фирма за новинско издавачка дејност „Медиа принт ДООЕЛ“ е отворена денеска во Централниот регистер. Сопственик и управител на фирмата е Александар Динев, вработен во компанијата „Медиа Принт Македонија“. Приоритетна дејност на оваа новоотворена компанија е печатење весници, а се отвора со влог од 5.000 евра.
Продолжуваат промените во сопственичката структура во МПМ. Од компанијата најпрвин се повлекоа и ги продадоа своите удели бизнисменот Јордан Камчев и поранешната директорка на МПМ, Јана Станисављева. Срѓан Керим остана сам во компанијата, како сопственик и управител.
А, од денеска во „семејството МПМ“ влегува уште една нова фирма „Медиа принт ДООЕЛ“.
Овие промени почнаа да се случуваат во време кога вработените во „Утрински весник“, „Дневник“ и „Вест“ стапија во штрајк поради неисплатени плати и хонорари. Тие денеска соопштија дека штрајкот продолжува, а од петок размислуваат и за радикализација, бидејќи нема никаква најава за исполнување на нивните барања – исплата на јануарската плата и увид во финансиката состојба на МПМ.
Во саботата синдикални претставници од трите дневни весници имале средба со Срѓан Керим, кој барал штрајкот да се стави во мирување, а во меѓувреме менаџментот да бара начини за надминување на финансиската криза. Но, на денешниот состанок на кој синдикалните претставници им ги пренеле пораките од средбата со Керим на сите вработени, тие одлучиле штрајкот да не се прекинува, туку доколку до петок не им се исполнат барањата, да преминат во друга порадикална фаза.