Алијансата на Албанците (АА) го поздравува извршниот налог на претседателот на САД, Џо Бајден со кој се даваат големи овластувања на Министерството за финансии, во консултација со државниот секретар.
– Оваа наредба на одделот одобрува воведување санкции за лица одговорни за корупција во регионот, кои се вклучени во злоупотреба на јавни средства, злоупотреба на приватен имот за лична или политичка корист или вмешани во мито, се вели во соопштението на АА.
Алијансата за Албанците, се наведува во партискиот допис до медиумите, од основањето е сериозно заинтересирана за расчистување на политичката сцена од такви елементи кои стануваат пречка за развојот на Македонија во сите димензии, како и на патот на интеграцијата во Европската Унија (ЕУ).
– Убедени дека коруптивни елементи имало во сите претходни влади, како и во сегашната, потврдени и во извештајот на Транспаренси Интернешнл, ја оценуваме како несериозна тенденцијата на заменик премиерот за борба против корупцијата како и владата да го сокријат целосниот неуспех во борбата против криминалот и корупцијата, пристапувајќи кон оваа наредба само од политичката призма на Охридскиот и на Преспанскиот договор, истакнуваат од АА.
Двата документа за АА се неспорни, но партијата смета дека примарна цел на оваа наредба се санкции против поединци кои се одговорни за корупција.