Постапката за набавка на јаглен од Косово е во тек и во ниту еден момент досега, ниту еден официјален претставник во преговорите не споменал во јавноста детали од преговорите, особено не во однос на цената на јагленот.

Податокот на кој се повикува посоченото лице во својата изјава е податок од неименуван извор споменат во дел од медиумите. Но, и тој податок е искористен парцијално, само за потребите на денешната изјава, а со цел нанесување на штета на имиџот на компанијата, се наведува во дописот до медиумите од АД ЕСМ.

Во интерес на вистината, според експерти кои дел од медиумите наводно ги консултирале, цената на ископан тон јаглен во рудниците на Косово изнесува 8 евра, но додека стигне до РЕК Битола цената се искачува на 23 евра заради транспортните трошоци.

И покрај тоа што двата податоци се погрешни, портпаролот на ВМРО – ДПМНЕ во денешата своја изјава не го зел тоа во предвид, веројатно со единствена цел да наштети на имиџот и угледот на компанијата.

Споредувањето, пак, на постапката за обезбедување на јаглен со цел зголемување на домашното производство и најавите за евентуални намалувања на трошоците на компанијата согласно можностите што ги дава Законот за работни односи, се неетички и неморални.

Станува збор за два неповрзани процеси кои имаат една заедничка цел – справување со енергетската криза што ја погоди земјава и европскиот континент, го завршува својот демант АД ЕСМ.

Имено денеска опозициската партија ВМРО-ДПМНЕ, преку портпаролот Наум Стоилковски јавно праша: Каде треба да завршат 7 милиони евра разлика во цени од ископот на јаглен, и дали затоа РЕК го склучува договорот без тендер?

Ниту во време на најголемата енергетска криза, СДСМ не се откажува од директни преговори и празнење на буџетот наменет за енергетика. Од една страна носат решенија за бркање на луѓе на принуден одмор, од друга страна, со непосредна спогодба, повторувам СО НЕПОСРЕДНА СПОГОДБА, прави договор на 19 милиони евра.

ЕЛЕМ, државната компанија за производство на струја, склучи спогодба и договор во постапка со преговарање без претходно објавување на оглас на 19 милиони евра, за ископ на 1,4 милиони тони јаглен, откако цело лето не се копаше јаглен и земјата ја втурнаа во тешка криза.

Овој тендер доаѓа во време кога се носи и решение за принуден одмор на работници од компанијата! Од една страна принуден одмор, заради кризна ситуација, од друга страна директен договор на 19 милиони евра, коментираа од ВМРО-ДПМНЕ, што е предмет на денешниот демант на АД  ЕСМ.