Агенцијата за филм на Република Македонија известува дека ги вратила назад првите 300.000 евра државни пари од хрватската продукција „Јадран филм“ како последица на неисполнувањето на договорот за производство на играната серија „Македонија“.
Согласно правосилно извршно решение, Агенцијата за филм инфомира дека направила поврат на речиси 19 милиони денари, колку што имало на сметката на „Јадран филм“ во моментот кога била блокирана.
„Ова не е целосната сума која државата му ја исплатила на хрватскиот продуцент Винко Грубишиќ. Таа изнесува 68 милиони денари или 1.100.000 евра со обврска тој до септември годинава да достави готови епизоди од првата сезона. Како ќе се наплати остатокот ќе знаеме по завршување на истрагата на Јавното обвинителство и Финансиската полиција кои ја проверуваат документацијата за целиот период, од објавениот конкурс во декември 2015 до 4.септември, кога истече рокот за предавање на 14 епизоди од серијалот“, се вели во соопштението од Агенцијата за филм.
Хрватската продукција „Јадран филм“ имаше обврска до септември годинава да достави готови 14 епизоди од серијалот „Македонија“ но тоа не беше сторено и договорот со нив беше раскинат затоа што во него постои извршна клаузула.
ЊВо недостаток на снимени материјали, односно непостоење на серија, „Јадран филм“ продолжува да манипулира со јавноста пласирајќи кратки видеа снимени во Загреб кои имаат за цел да остават впечаток во јавноста дека нешто се работи. Мојот апел е јавноста да не наседнува на овие трикови кои имаат за цел на целата работа да и дадат политичка заднина, наместо целата работа да се заврши правно. Договорот беше многу јасен – обврска на „Јадран филм“ беше да достави готови епизоди во септември, а не да објавува трејлери и сцени во неколку секунди во ноември. Дополнително, Грубишиќ изнесува видео материјали во јавноста, а при тоа ни тие снимки ги нема доставено до Агенцијата за филм“, вели директорот на Агенцијата, Горјан Тозија.
Тозија посочува дека Грубишиќ бил спремен да потроши илјадници евра за маркетинг кампања, да узурпира медиуми кои ќе му објавуваат некакви кратки сцени „за да сее магла пред јавноста дека тој работи, ама ние не му даваме да доработи, но заборава на фактот дека не треба сега да снима и да пласира видеа, тој требал согласно договорот, веќе да има готови епизоди“.