Сезоната во женскиот тенис заврши, а пред крај на активностите и на тенисерите за 2019 година. Пред нив е уште завршниот турнир во Лондон кој треба да даде одговор на прашање кој ќе влезе во 2020 година и првото место на АТП листата – Рафаел Надал или Новак Ѓоковиќ.
Шпанецот оваа недела го презеде врвот со 640 бода предност во однос на српскиот тенисер. Но, настапот на Надал во Лондон е неизвесен додека се вложуваат максимални лекарски напори за негово оспособување за предизвиците во „О2 арена“. Причина се болките во стомачните мускули што тенисерот од Мајорка ги пријави пред полуфиналето на Мастерсот во Париз.
„Тешко е прецизно да се лоцира повредата, но Рафа може да размислува за Лондон. Досега не сме донеле одлука, но ако отпатува на завршниот Мастерс, тоа значи дека ќе биде способен за настап“, изјави Анхел Луис Которо кој изрази надеж дека Надал ќе биде во можност да заигра за одбрана на првото место на АТП листата.
Которо порача дека Надал ќе мора да направи промени во сервисот поради болките во стомакот што ги има, меѓутоа нагласи и дека повредата што го мачи во моментот не се одразува на неговата игра од основната линија.
Турнирот во Лондон почнува на 10 ноември, а доколку не се опорави, Надал ќе се соочи со губење на позицита на ранг листата. Доколку, пак, не биде во можност да заигра, тогаш Ѓоковиќ ќе треба да се пласира во финале за кам-бек на врвот.