Тимот на Скендербег остана без титула во албанскиот фудбалски шампионат за сезоната 2015/16. Ова доаѓа како последица на одлуката на Етичкиот комитет при Фудбалската федерација на Албанија што е образложена со „влијание на резултати што е во спротивност на спортската етика“.
Згора на тоа е изречена казна од 14,800 евра и одземање на 12 бода за сезоната 2016/17. Она што сè уште е нејасно е дали титулата ќе му биде доделена на Партизани, екипа што заврши како втора во првенството на западниот сосед.
Минатата година Скендербег беше санкциониран и од УЕФА со една година забрана за настап во европските фудбалски купови поради сомнителни обложувања на четири натпревари во Лигата на шампиони и во Лига Европа во 2015 година. Но, тоа не е се. Од 2011 година, клубот се сомничи дека наместил педесетина мечеви во домашната сцена.