Албанските партии остро го осудија речникот на функционерите на ВМРО-ДПМНЕ и извиците на симпатизерите на оваа партија пред ДИК, објави АлсатМ.
ДУИ смета дека ваквите притисоци нема да помагнат за излез од кризата:
„Пропагандистичките политички партиски притисоци како оние кои ги прават македонските политички партии или оние на другите етникуми, не помагаат во процесот и затворањето на кризата“, се вели во писмената реакција на ДУИ
За “Беса” вчерашниот речник на функционерите на ВМРО-ДПМНЕ ги влошува меѓуетничките односи. Партијата повтори дека нема да преговара со актуелното лидерство на ВМРО-ДПМНЕ.
“Дозволете ми да кажам дека овој јазик на омраза на ВМРО кон Албанците, ова сеење омраза кон Албанците воопшто не придонесува за доброто на земјата, не придонесува воопшто за односите во оваа земја. Сметаме дека тензиите во меѓуетничките односи, предизвикувањето тензии уште повеќе ги влошува меѓуетничките односи и сета таа тензија ја ставаат во функција на дневната политика”, изјави Орхан Муртезани од “Беса”.
Од „Алијансата за Албанците“ рекоа дека последните изјави на функционери на ВМРО-ДПМНЕ носат длабок национализам и исклучуваат каква било соработка со овој политички субјект. „Тука имаме националистички и шовинистички изјави. Реално, оваа реторика постои од пред многу, многу години, да не речам со векови. Но, има и нешто друго, некои политичари да излезат, да даваат изјави и да се закануваат со Ноќ на ножевите и слични изјави, Ноќ на ножевите која може да им се врати како бумеранг. Што се однесува на можноста за коалицирање од наша страна со вакви партии, не верувам дека ќе имаме таква коалиција, не верувам. И да ни ги исполнат сите услови за да направиме некоја можна коалиција со ВМРО-ДПМНЕ, тоа не доаѓа предвид!“ – изјави Арбан Балиу од Алијанса за Албанците.
ДПА не сакаше да реагира на вчерашниот речник на протестите.