Леонардо Бонучи е отстранет од првиот тим на Јувентус за дуелот со Порто во Лигата на шампиони. Ова е епилог по вербалниот конфликт на фудбалерот со тренерот Масимилијано Алегри за време на натпреварот со Палермо во Серија А што кулминира пред осминафиналето во елитното натпреварување.
Одлуката на Алегри треба да е јасен сигнал за италијанскиот репрезентативец дека псовките од петокот не се заборавени, па затоа ќе биде гледач повеќе на „Драгао“. Веста оди во прилог на португалскиот првак, но и на менаџерот на Челзи, Антонио Конте кој сака да го доведе искусниот стопер на „Стемфорд бриџ“.
Отсуството на Бонучи, пак, не треба да претставува проблем за одбраната на Јувентус. Информациите од Торино велат дека Барзалји и Кјелини навреме ги санираа повредите и се враќаат на располагање на Алегри за предизвиците во Лигата на шампиони, но и во Серија А.