Во моментот работиме со максимална искористеност на своите производни капацитети и човечки ресурси кои ги има на располагање. Направивме реорганизација на сите процеси со цел да ги задоволиме барањата на македонскиот пазар за лекови, дезинфициенси, медицински алкохол, антисептици и останати средства со антибактериско дејство. Во моментот, поради големата побарувачка на дел од горе наведените производи и предизвиците со кои се соочуваме при набавка и транспорт на суровини и амбалажа од увоз, можно е да се јави застој во некој сегмент, но во никој случај нема да се дозволи прекин во снабдувањето на било кој од споменатите производи, се вели во соопштението на „Алкалоид АД Скопје“.
Согласно вонредните услови на функционирање, стои во дописот на компанијата, и покрај отсуството на преку 150 вработени кои се ослободени од работа заради тоа што припаѓаат на ризичните групи, приоритет во снабдувањето со средства за дезинфекција и хигиена даде на болниците, здравствените домови и институциите кои функционираат во кризни услови.
„Доставата до веледрогериите (аптеките) и дистрибутерите (ланците маркети) можно е во овој период да се одвива со мал застој, но тоа е првенствено заради неумерените набавки од страна на домаќинствата и очекуваме дека наскоро истото ќе се надмине“, порачуваат од фармацевтскиот гигант.
Водени од начелата за корпоративна општествена одговорност, како и хуманата програмско-
производна определба насочена, пред сè, кон крајните корисници „Алкалоид АД Скопје“ нагласува дека цврсто ќе остане на одлуката да не ги зголеми цените на ниту еден производ од било кој сегмент на своето производство независно од зголемувањето на цените на влезните суровини, логистичките и
ресурсните предизвици со кои се соочуваме.
„Излезните цени на нашите производи, особено на лековите, дезинфициенсите, медицинскиот алкохол, антисептиците и останатите средства со антибактериско дејство се дистрибуираат согласно ценовниците кои важат од 1 февруари 2020 година и ќе останат исти“, потенцираат од „Алкалоид АД Скопје“.