Во Европската Унија не гледаат потреба од нови избори во Македонија. Изборите во декември веќе ги оценија како фер и слободни со јасни резултати, а нивно повторување само би ја продолжило кризата, но стравуваат и дека ќе ја дестабилизираат Македонија, истакнаа амбасадорите на денешната панел дискусија „Креирање и реконцептуализација на мали и средни држави“, организирана од Дипломатскиот клуб во Скопје.
Ваутер Пломп, амбасадор на Холандија смета дека нови избори само ќе ја пролонгираат кризата која и онака трае долго.
„Изборите што се одржаа во декември беа слободни и фер, како што потврдија многубројните меѓународни набљудувачи. Затоа би имало многу малку корист од нови избори толку брзо по изборите во декември“, вели Пломп.
За шведскиот амбасадор Матс Стефансон одржувањето избори е опасна опција. Но тој смета дека партиските лидери можеби треба да почнат дијалог.
„Нови избори во ваква ситуација би се одржале во клима на екстремна конфронтација, што не е добро за стабилноста. Решението треба да се бара во Уставот. Мислам дека е прерано и за Пржино 3 и не сум чул дека за тоа се разговара. За лидерски средби, немам инсајдерски информации, но во ситуација на таква конфронтирачка политичка клима во Македонија дијалог меѓу опозицијата и владата не е лоша идеја, но тие треба да решат“, вели Стефансон.
Словенечкиот амбасадор Милан Јазбец порачува дека на Македонија и треба нова влада, а не нови избори.
„Фокусирајте се на суштината, обидете се да формирате влада, според односите во парламентот, не гледам потреба за нови избори“, изјави Јазбец.
Амбасадорите не ги потврдија најавите на германскиот весник „Шпигел“ дека во Европската Унија се дискутира за воведување санкции со забрана за патување и блокада на сметки на водечките македонски политичари.