Перо Антиќ како мнозински акционер, Марјан Србиноски како тренер. Ова се структурални и кадровски новитети во Гостивар пред кам-бекот на кошаркарскиот клуб од овој град во најквалитетното домашно друштво. Гостиварци се желни за елитен баскет, а со привлечените имиња најавуваат дека во новата сезона не сакаат да бидат само статисти и да имаат епизодна улога туку да бидат и фактор.

„Огромно е задоволството што ќе имам можност да придонесам во враќањето на мојот матичен клуб на старите патеки и слава. Покрај понудата ме мотивира и приложениот концепт за кој може да кажам дека е уникатен во Македонија и ќе биде пример за функционирање и на останатите екипи. Она што може да го ветам е напорна работа и беспоштеден ангажман на секој поединец на теренот. Со нетрпение го очекувам почетокот на сезоната, преполните трибини и атмосферата во салата“, рече Марјан Србиноски, новиот тренер на гостиварци.

И тоа не е се. Во концептот на гостиварци, покрај натпреваруварувачкиот аспект како развојна сегашност, важно место зазема и определбата за прераснување во регионален кошаркарски центар и продукција на млади играчи во перспектива.

„Изготвивме амбициозен план и програма за што ќе работиме на долг рок. Намерата е да поставиме темели на репрезентативен модел на клупска оргаанизираност и структура. Ќе бидеме фокусирани на повеќе нивоа. Затоа и ангажманот на еминентни кошаркарски имиња меѓу кои и Младен Ѓуроски, новиот тим менаџер, кому во целост му е доверено организациското функционирање на кошаркарскиот сегмент“, истакна Димитар Спасеноски, член на Управниот одбор на Гостивар.