Американскиот Сенат го отфрли законот за имиграција што го предложи претседателот Доналд Трамп.
Сенатот го отфрли предлог-законот предложен од сенатори и од Републиканската и од Демократската партија со кој се озаконува статусот на „сонувачите“, а за кој Белата куќа се закани дека ќе стави вети. За него гласаа 54 сенатори, а 45 беа „против“, но за усвојување беа потребни најмалку 60 гласа.
Потоа Сенатот го отфрли и вториот предлог-закон, поддржан од Трамп, за кого гласаа само 39 сенатори. При тоа гласање дел од републиканците гласаа против како и опозициските демократи.
Тоа е четврти одбиен предлог закон на оваа тема.
Со тоа, статусот на имигрантите е доведен во прашање посебно откако американскиот претседател Доналд Трамп го укина законот ДАЦА на неговиот претходник Барак Обама, со кој се овозможуваше „сонувачите“ да продолжат да живеат и работат во САД, без страв од депортација.
Претседателот Трамп како отстапка на демократите ја предложи можноста, имигрантите кои во САД стигнале како деца, да добијат државјанство за 10 до 12 години.
За возврат побара 25 милијарди долари за изградба на ѕид на границата со Мексико и други мерки за гранична безбедност. Демократите, но и повеќе републиканци се против изградбата на таков ѕид.