Во Македонија само 45 проценти од жените на возраст од 15 до 24 години се вработени или се обучуваат, а околу 60 проценти не прават ништо, иако имаат соодветно образование и квалификации, велат истражувањата на Светската банка.
Поради родовата нееднаквост и малото учество на жените на пазарот на труд се прават загуби од околу 15 проценти во Бруто домашниот производ (БДП).
Оттаму оценуваат дека доколку се зголеми вработувањето на жените и се искористат нивните вештини и квалификации тогаш тоа сигурно ќе се одрази и на зголемувањето на БДП.
– Многу е тешко да се пресмета колкав би бил растот, но зголеменото учество на жените во економската активност позитивно влијае врз економскиот развој, истакна Марко Мантованели, директор на Канцеларијата на Светска банка во Скопје на денешната презентација на работилницата „Градење сознанија за инклузивен раст и создавање работни места во Западен Балкан“.
Дел од причините за ова, Светска банка ги гледа во тоа што жената е онаа која се уште ги чува децата или се грижи за старите лица во семејството и нема време да се вклучи на пазарот на труд.