Специјалните јавни обвинителки, Катица Јанева и Фатиме Фетаи го прекршиле Етичкиот кодекс на јавните обвинители, заклучил Советот на јавни обвинители на седницата која ја одржал вчера.
Петар Аневски, претседателот на Советот пред новинарите изјави дека Советот ја разгледувал претставката на в.д. претседателката на Кривичниот суд во оставка која на последното рочиште за случајот „Насилство“ ги казни Јанева и Фетаи со по две илјади евра казна за непочитување на судот.
Аневски одговарајќи на новинарско прашање за обвинувањата од Јанева и Фетаи кон Михајлова дека направила груб фалсификат на записникот од претходното рочиште, тој рече дека тоа воопшто не е битно за Советот, туку само однесувањето на обвинителите.
„Вчера ја разгледувавме претставката од в.д. претседателката на Кривичниот суд, Татјана Михајловска во врска со настанот од 22. 2 .2017 година кој што се случи на главниот претрес кога јавните обвинителки беа казнети со парична казна. Советот изврши увид, односно преглед на цедето кое беше во прилог и донесе заклучок дека јавните обвинителки Катица Јанева и Фатиме Фетаи го прекршиле етичкиот кодекс на јавните обвинители на Македонија. Исто така дадовме препорака до јавниот обвинител дека ќе треба да ја разгледа можноста за определување нов обвинител во овој конкретен случај, мислам дека беше „Насилство“ во кој обвинет е поранешниот премиер Никола Груевски. Утврдивме дека ги прекршиле основните начела на Етичкиот кодекс, особено членот 14 каде е регулиран односот меѓу судот и обвинителите“, рече Аневски.
Тој додаде дека постои и Етички совет кој се грижи за примената на Етичкиот кодекс и според него во иднина би требало и тој да се вклучи во ваквите случаи.
Аневски дополни дека однесувањето на двете обвинителки кон судијката Михајлова било недолично и како што рече, досега не се случило, вакви навреди да упатуваат јавните обвинители кон судот.
Следното рочиште за овој случај ќе се одржи утре во 10 часот.
Во овој случај обвинети се 14 лица, од кои пет лица како поттикнувачи, а останатите како директни извршители на насилството. Првообвинет е Никола Груевски, а обвинети се и ексминистерот Миле Јанакиески и поранешната советничка во Општина Центар, Даниела Рангелова.
Според обвинението, Груевски во случајот кој беше обелоденет во една од „бомбите“, е нарачател на насилството, а Јанакиески прифатил преку партиски членови да го спроведе насилството врз градоначалникот на Центар, Андреј Жерновски и членовите на општинскиот совет.