Груевски ги повикува граѓаните да ја одбранат Македонија од нападот со албанската платформа, тој е во коалиција со ДУИ, партијата која е носител на платформата, изјави денес на прес конференција Стојанче Ангелов, лидерот на “Достоинство”. И додаде дека ВМРО-ДПМНЕ има легални алатки со кои може да ги закочи законите со кои би била загрозена македонската унитарност доколку СДСМ се обиде на мала врата да протне ваков закон.

Тој го повика ВМРО-ДПМНЕ да излезе од владата во која седат со ДУИ, партијата носител на албанската платформа од која наводно ја бранат Македонија. Ангелов ги повика и демонстрантите од „За заедничка Македонија“ да извршат притисок врз министрите на ВМРО-ДПМНЕ кои уште коалицираат со партија која, како што велат, сака да ја федерализира Македонија.

“Никола Груевски објави дека Македонија е нападната и ги повика граѓаните да излезат на улица и да ја одбранат. Според него, нападот е извршен со таканаречената албанска платформа која наводно го загрозува македонскиот суверенитет и претставува опасност за федерализација.

Носители на платформата се албанските политички партии помеѓу кои и ДУИ. Во овој момент функционира техничка влада од ВМРО-ДПМНЕ и ДУИ. Во исто време додека Груевски ги повикува граѓаните да ја одбранат Македонија од нападот со платформата, тој е во коалиција со партијата која е носител на платформата, ДУИ, рече Ангелов.

Затоа ги повикуваме Никола Груевски, Емил Димитриев и сите министри да дадат неотповиклива оставка и да престанат да бидат во коалиција со тие што ја напаѓаат Република Македонија. Доколку една третина од министрите дадат оставка, Собранието треба да поведе постапка за избор на нова влада”, рече Ангелов.

Тој им се обрати и на водачите на протестите “За заедничка Македонија” и ги повика да направат притисок врз “ВМРО-ДПМНЕ да ја напушти владата во која се со една од партиите која ја загрозува македонската унитарност”.

“Таканаречената албанска платформа е политичка платформа, тоа не е мировен договор, нејзиното спроведување зависи од политичката волја на партиите кои ќе ја сочинуваат идната влада. Зоран Заев беше јасен, дека ниедно барање од платформата кое излегува од рамките на Уставот нема да биде имплементирано во закон. Доколку СДСМ се обиде на мала врата да протне закон со кој ќе биде загрозена македонската унитарност, ВМРО-ДПМНЕ има легални алатки со кои може да ги закочи ваквите закони.

Ги повикуваме ВМРО-ДПМНЕ да се ослободат од стравот дека некој ќе ја федерализира Македонија, зошто тие со ваквата иста тактика со која го блокираат Собранието, како опозиција ќе бидат гарант дека нема да може да пројде ниту еден закон во Собранието”, рече Ангелов.