Published: Monday, July 27, 2020 22:16
Да се осмисли, дизајнира и имплементира една мерка како Домашна платежна картичка беше навистина голем предизвик, напиша министерката за финансии, Нина Ангеловска на нејзиниот Фејсбук профил.
„Заклучно со 25 јули се издадени над 300.000 домашни платежни картички. Сите приговори се обработени. Од 46.000 приговори, прифатени се 9.200 од кои 5.800 од млади лица од 16 до 29 години, 700 невработени лица со низок доход и околу 2.700 вработени лица со низок доход. Картичките и за овие граѓани се испечатени и се издаваат“, порачува Ангеловска.
Министерката за финансии за домашната платежна картичка истакнува дека е прва мерка со нов начин на имплементација – без бирократија, без шалтери и аплицирање и се реализира во координација со голем број државни институции и банки што се вклучени во проектот.
„Исклучително краток период. Оптимално дизајнирање за да даде максимални ефекти со фокус на македонските производи и услуги. Покрај главната цел на мерката е да се амортизира ударот врз економијата преку стимулирање на приватната потрошувачка, ја креиравме на оптимален начин да даде и други значајни ефекти на патот кон современо општество“, стои во постот на Ангеловска.
Таа потсетува дека домашната платежна картичка е во насока на помош на граѓаните кои преку поголемата потрошувачка на македонски производи и услуги го помагаат стопанството и економијата. Проектот од третиот сет на економски мерки на Владата е во насока и на подигнување на свеста за домашното, за зголемување на безготовинските плаќања што се директно поврзани со неформалната економија, за промена на навиките, но и за подобрување на квалитетот на дата-базите на институциите.
„Се работи за многу обемна мерка, која од нејзино конципирање до реализација се спроведе во навистина многу краток рок – односно од носењето на уредбата до издавањето на првата картичка поминаа само 2 недели“, додаде Ангеловска.