Многу е важно кога гледаме податоци, тие да бидат потполни. Многу мала е разликата да се соопштува податок за одјави по основа на М1 и М2 од Агенција за вработување, без да се спореди со пријавите и со истиот период од минатата година. Вака министерката за финансии Нина Ангеловска на денепната прес-конференција одговори на новинарското прашање дали е точно дека во март оваа година се поделени отказни решенија за 20.000 граѓани, наспроти 1.900 лица како што покажуваат податоците на Агенцијата за вработување.
Ангеловска напомена дека актуелната ситуација сериозно, но и реално се согледува. Затворање на одредени работни места се очекува, но и се преземаат напори за тој ефект да биде минимизиран.
„Најновите податоци во овој момент ги немам, но Агенцијата за вработување ги има и може да ги сподели. Важно е дека ако сме одјавиле 20.000 лица, а биле пријавени 16.000, се работи за нето ефект кој треба да биде погледнат од пријавени и одјавени лица. Ако истиот тој период и истите бројки се споредат со лани, трендот е дека се бележи одредено намалување на бројот пријавени наспроти одјавени. Мораме на оваа сериозна ситуација да и пристапиме со доза на реалност. Дали е нормално да очекуваме дека ќе има и одредени затворања на работи места – да, дали преземаме се за тој ефект да биде минимизиран за што помалку луѓе бидат одјавени и за што повеќе луѓе да го задржат своето рабтно место – апсолутно да. И тоа се прави системски, со сетови на мерки за да биде побрза фазата на реално опоравување“, нагласи министерката.
Според неа, многу е потешко компанија со 20 или 50 вработени, а камоли со над 100 вработени, која инвестирала во луѓето, да ги отпушти, за потоа повторно да бара кадар
„Затоа се важни сите мерки што ги преземаме и дека се во насока на заштита на работните места, но и дека сме реални, дека знаеме дека ќе има такви кои ќе го загубат работното место. Но, и за нив има решение – прво да бидат згрижени, да им биде обезбеден надоместокот за невработеност, а пота и брзо да се вратат на работното место кога ќе почне фазата на опоравување“, рече Ангеловска.
За транспарентноста на оваа Влада, дополни, говорат сите активности кои досега беа преземени. „Само откако сум јас дојдена, беа лансирани три алатки за транспарентност“, подвлече министерката.
Таа претходно, на прес-конференцијата во Владата, информираше за новата кредитна линија за бескаматни кредити преку Развојната банка. Соопшти дека од среда, 29 април, микро, малите и средните компани од сите дејности, погодени од кризата, ќе може да аплицираат за втората линија бескаматни кредити „ковид 2“ во вкупна вредност од осум милиони евра.
Средствата се обезбедени преку компензациските јапонски фондови, а ќе се реализираат преку Развојната банка. Ова е дел од вториот сет антикризни мерки за подршка на фирмите и граѓаните.
Како што рече Ангеловска, првата линија бескаматни кредити, „ковид 1“ изнесуваше 5,7 милиони евра и беше наменета за најпогодените три сектори: туризам, транспорт и угостителство. Досега по однос на оваа линија се одобрени апликации на 254 компании во износ од 2,2 милиона евра во кои работат околу 3.000 лица. „Но, интересот за бескаматните кедити е многу поголем, мерката доаѓа во вистинско време“, напомена министерката Ангеловска.