Најавените платежни картички со средствата за граѓаните се очекува да бидат поделени во периодот јуни-јули, како што стои во третиот сет на економски мерки, додека ваучерите за туризам граѓаните би ги добиле во јуни, најдоцна јули и предвидено е истите да се користат до крајот на 2020 година, соопшти министерката за финансии Нина Ангеловска на денешната прес-конференција. Притоа нагласи оти Уредбите за користење на овие мерки се очекува да бидат доставени и усвоени до крајот на следната недела.
Електронските платежни картички, појасни Анегловска, ќе бидат сетирани така што нема да може да се подигнуваат средства од банкомати и ќе бидат исклучиво наменети за купување на домашни производи, додека со МИОА се работи на тоа секој граѓанин да може со впишување на матичниот број да провери дали и колку му следува финансиска поддршка.
„Веќе се работи на конкретното оперативно решение. Вчера имавме средба со македонската банкарска асоцијација и со банките, ги утврдуваме деталите и Уредбата веќе е во нацрт верзија и денеска ќе биде испратена за комуникација до сите засегнати страни. Се работи интензивно за спроведување на сите мерки и нема простор за нетрпеливост“, изјави Ангеловска.
Во однос на таргетираните групи за електронски платежни картички, Ангеловска рече дека првата мерка од 9.000 денари финансика поддршка се однесува на невработени лица, активни баратели на работа, лица до 15.000 денари месечни примања, согласно податоците од УЈП, потоа вработени со примања до 15.000 денари, младите, студентите и средношколците.
„Работиме за елиминација на моментот секој граѓанин да треба самоиницијативно да аплицира. Податоците и базите од УЈП ни дозволуваат таргетирање и можеме веднаш да видиме колку средства, месечни примања имаат и веќе со таа листа имаме прелиминарно одредено на кои точно граѓани колкава финансиска помош им следува“ нагласи Ангеловска.
Во однос на мерките за стопанството, Ангеловска рече дека во програмата на Владата има 150 милиони евра, од кои 25 милиони евра за платежната картичка, 60 до 65 милиони евра за поддршка на работодавачите за исплата на плати и дополнителни 50 милиони евра кои ќе се насочат за дизајнирање и креирање на навремени мерки.
„Без поддршка и насочување на граѓаните да одат во македонските туристички капацитети, би имале околу 50 проценти пад во бројот на ноќевања. Со поддршката од 10 до 12 милиони евра за над 100.000 граѓани, ќе успееме да го ублажиме падот за повеќе од двојно. Тоа значи дека мерката директно ќе го амортизира ударот и ќе го помогне туристичкиот сектор“, изјави Ангеловска, посочувајќи дека вакви анализи се прават за сите сектори.