Фудбалската репрезентација на Македонија бележи одличен вовед во квалификациите за Европското првенство во 2020 година. Во четвртокот во Скопје ја совлада Летонија со 3:1, а вечерва одигра 1:1 против Словенија на стадионот „Стожице“ во Љубљана. Задоволството од играта, но и од резултатот не крие селекторот Игор Ангеловски кој, сепак, жали што не е освоен целиот плен во вториот меч во групата Г.
„Пред овие два меча во март реков дека наша цел се минимум три бода. Сè над тоа ќе биде добро за нас. Но, според вечерашната игра против Словенија може слободно да изразам жалење што не победивме. Задоволен сум од играта, создаваме шанси и тоа на гостински терен. Ако ја задржевме концентрацијата во завршницата од мечот можевме и со три бода да се вратиме во Скопје“, истакна селекторот Ангеловски по средбата.
Македонската селекција отворено ` пристапи на Словенија. Покажа желба за игра и надигрување, а со тоа, конечно, и зрелост за жетва на бодови и надвор од Скопје. На голот на Зајц во 34. минута одговори Енис Барди во 47. минута. Во првото полувреме и тој и Пандев не успеаја со удари во казнениот простор да го совладаат Јан Облак, а во вториот дел Егзон Бејтулаи спречи втора радост на „Стожице“ на словенечките фудбалери и навивачи.