Македонија на рутина впиша три бода во премиерниот настап во Лигата на нации на УЕФА што за една селекција од Д дивизијата ќе биде пат до Европското првенство во 2020 година. Архивиран е Гибралтар на гости со 2:0 по сценарио што креира посакуван исход. Фудбалерите се потврдија како фаворити и не дозволија изненадување, селекторот Игор Ангеловски, пак, изрази задоволство од успешно одработената авантура на југот на Пиринејскиот полуостров.
„Го постигнавме тоа за што и дојдовме, си одиме со тоа што го посакувавме. Наша цел беа трите бода во што и успеавме. Сакавме што поскоро да дадеме гол и да го потврдиме со уште еден за потврда, па потоа да довршиме рутински. Во паузата се договоривме да не се трошиме и да сочуваме сили за натпреварот со Ерменија. Затоа Пандев остана во соблекувална на полувреме“, истакна Ангеловски по триумфот на стадионот „Викторија“ на Гибралтар.
Горан Пандев е, секако, задоволен со позитивното затворање на епизодата Гибралтар, но притоа изрази незадоволство од условите за игра на стадионот. Забелешките на капитенот се однесуваат на слабите луксеви на рефлекторите и вештачката подлога на стадионот што ја оцени како лоша меѓутоа за среќа мисијата е комплетирана без непосакувани повреди, па заедно со сите повикани играчи остануваат на располагање на стручниот штаб за недела и мечот на домашен терен со Ерменија, селекцијата која важи за единствен кандидат на „црвено-жолтите“ за првото место во четвртата група во Лига Д.