Published: Monday, October 10, 2016 01:30
Селекторот на Македонија со порака дека пробал да ги затвори приодите кон голот на Богатинов по 2:1, но, за жал, тимот не издржа
Игор Ангеловски во најавата за натпреварот со Италија во призна дека противничките фудбалери се фаворити, но нагласи дека македонските не сакаат да бидат статисти против четирикратниот светски првак. Така и беше. Момците во црвено не само што не беа во епизодна улога туку ги поставија „азурите“ пред голем предизвик во последните 25 минути на „Филип Втори“.
„Би сакал да честитам на Италија за победата меѓутоа вистинските честитки одат за моите фудбалери. Играа против четирикратен светски шампион и не се исплашија. Знам дека можеби ќе ме критикувате ама не заборавајте со кого игравме“, истакна Ангеловски на средбата со новинарите.
Македонија успеа да направи пресврт против една Италија што, за жал, не успеа макар до реми на крајот. Повторно беше фатално продолжението во кое Имобиле по вторпат го совлада Богатинов за огромна радост на „азурите“. „Пробавме да се затвориме со измените. За жал не издржавме. По водството со 2:1 имавме шанса и за трет гол. Не го постигнавме по што следуваше она непишано фудбалско правило за казна кога нема да се искористат своите прилики. Не отстапуваме ниту од играта ниту од формацијата. Уште понапорно ќе работиме. Ни фалат само резултати, а тие се најважни во фудбалот“, порача селекторот на фудбалската репрезентација на Македонија.