Одговарајќи на денешните пратенички прашања, вицепремиерот задолжен за економски прашања, Кочо Анѓушев констатираше кои се конкретните мерки на кои државата треба да се фокусира за да го спречи загадувањето на животната средина и воздухот.

Како што рече тој, студиите забележуваат дека најголем загадувач е загревањето на домовите, потоа втор најголем извор на загадување се автомобилите, а третата е индустријата.

„Како да се реши проблемот? Со дејствување на причините а не на последиците. Мораме да го измениме начинот на греење. Не може на дрва, сецкан ќумур или гуми да се греат домаќинствата. Единствен начин како да се реши тоа е да се заменат горивата. А како тоа? Така што секаде каде што има горива кои прават полуција на ПМ10 честици, да се заменат со горива кои не го прават тоа. Зато е гасификацијата важна. А таа треба да тргне од надворешните прстени на градот Скопје а да тргне кон центар, а топловодната мрежа од центар кон надвор. Изворите се јасни, треба на нив да се дејствува“, рече Анѓушев.

Во однос на автомобилите тој даде забелешка дека најштетен елемент на државата досега и било што дозволила увезување на стари автомобили. Спротивно на тоа, тој вели, државата треба да субвенционира возила на гас или возила на електрична енергија.ж

„Најштетен елемент беше дозволата за увезување на половните возила кои загадуваат. Разбирам дека граѓаните немаат пари да купуваат скапи автомобили. Подобро е да најдеме начин да субвенционираме автомобили кои возат на гас или електрична енергија. Ние треба да помогнеме граѓаните да дојдат до субвенционирана помош. Да се откажеле на времето од четири лава, ќе имаше веќе пари за тоа“, тврди Анѓушев.

Во однос на индустријата, тој го посочи неработењето на Југохром без филтри.

„Третиот сегмент или индустријата…Југохром не е пуштен без филтри. Се договоривме дека филтер ќе се стави, поради Тетовскиот регион кој е еден од најзагадените региони и тука во индустријата не смее да има алтернатива при издувните гасови. Треба да има нулта толеранција за тоа. Филтерот на Југохром веќе се гради. Треба да се средат и котлите на РЕК Битола“, рече тој меѓу другото.

Тој потенцира дека треба да се дејствува на изворите, бидејќи се останато е само санирање на штетите што нема да биде доволно, а даде и детално образложение за средствата од Буџетот наменети за гасификацијата на цела Македонија.