Здружението за заштита на животни, „Анима Мунди“ бара да се прогласи карантин и да се забрани внесување на животни во стационарот за бездомни животни „Вардариште“, кој е под капата на  Град Скопје и на јавното претпријатие „Комунална хигиена“.

Од здружението велат дека во „Вардариште“ се случува помор на млади заловени  кучиња затоа што има епидемија на заразна болест штенечак – болест од која во страшни маки, болка, гушење умираат над 90 отсто од заловените млади животни.

„Животните се разболуваат во стационарот. Болеста не се пренесува на луѓе ниту друг вид животни но е фатална за млади кучиња. Бараме итно да се прогласи карантин и забрани внесување на животни кои со сместувањето тамо се осудени на бавна и агонична смрт, распаѓање на сите органи, процес кој е екстремно болен; гушење како последна фаза од животот. „Вардариште“ не смее да внесува мали животни зошто тие не ни можат да подложат на стерилизација, но тоа во континуитет го прави, а ваквите кучиња потоа сами умираат, на нив не се троши ни средство за еутаназија, во евиденција на стационарот влагаат како починати од природна смрт“, пишува во соопштението на здружението.

„Анима Мунди“ велат дека односот на Градот Скопје како град кој се залага за хуман третман на животните е скандалозно.

Од здружението го повикаа директорот на Агенцијата за храна и ветеринарство Зоран Поповски, во својство на претседател на Националниот центар за контрола на болести веднаш да интервенира и да го спречи понатамошното работење на овој.

„Информираме дека повеќе европски институции се веќе информирани за она што се случува во „Вардариште“ и наскоро очекуваме нивни реакции и поддршка за негово затворање се додека не се покаже вистинска намера на нашите надлежни институции да работат хумано и создадат услови за хуман третман на кучињата“, велат од здружението.

Ракип Дочи, директорот на „Комунална хигиена“ рече дека станува збор за шпекулација и дека он нема информација за штенечак во Вардариште. За видеата рече дека треба да се направи вештачење да се утврди дали се реални