Поголемиот дел од земјите имаат мали очекувања од владеењето на Доналд Трамп за време на неговиот мандат, според резултатите од анкетата на Ипсос МОРИ. Во истражувањето учествувале 18.000 луѓе од 24 земји, а на прашањето дали Трамп ќе биде добар претседател, најголем дел одговориле дека се песимисти.
Воопшто не е изненадување тоа што Мексиканците се во грч за следните четири години, од кои 81 процент одговориле дека Трамп ќе биде лош лидер.
Луѓето од Велика Британија исто така се мачат да најдат барем малку ентузијазам за новиот американски претседател, затоа што 80 отсто од нив се изјасниле дека Трамп нема да биде добар водач. Слично ниво на песимизам има и во Германија (78 проценти) и Франција (77 отсто). Северно од границата со САД, Канаѓаните во големо мнозинство се негативни кон доаѓањето на Трамп во Белата Куќа со само 27 проценти од нив, кои мислат дека изборот на Трамп е добар.
Во Америка, пак, мало мнозинство од 52 проценти, сметаат дека Трамп ќе биде успешен. Истражувањето откри дека Русија и Индија имаат многу повеќе позитивни очекувања од претседателството на Трамп. 74 отсто од Русите и 65 проценти од испитаниците во Индија мислат дека бизнисменот ќе владее коректно за време на неговиот мандат. На глобално ниво, Ипсос откри дека 34 проценти од луѓето се уверени дека Трамп ќе биде добар претседател, додека 66 отсто мислат дека тој ќе биде лош лидер на Америка.