Рејтингот на американското државно раководство во светот пораснал во првите шест месеци од претседателството на Џо Бајден, покажуваат резултатите од најновата анкета на „Галуп“ спроведена во речиси 50 земји.
Најновата анкета на „Галуп“, аналитичка компанијa со седиште во Вашингтон, е насловена „Рејтинг на светските лидери – САД наспроти Германија, Кина и Русија“.
На прашањето на „Галуп“ каков е впечатокот за раководствата на САД, на Германија, на Кина и на Русија, Германија го зазела првото место кај учесниците во анкетата од Европа, од Азија и од Јужна Америка, додека раководството на САД го зазело првото место само во Африка (53 отсто за САД наспроти 49 за Германија).
„Галуп“ синоќа јави дека податоците од анкетата не се целосни, но дека достапните податоци од 46 земји укажуваат за 49 отстотен рејтинг на американското раководство. Рејтинзите се намалиле во три земји – во Русија од 18 до 13 отсто, во Србија од 20 до 16 отсто и во Бенин од 54 до 50 отсто.
Рејтингот на американскиот врв, пак, пораснал во неколку европски земји. На 52 проценти во Португалија, до 45 проценти во Холандија и до 41 отсто во Шведска. Рејтингот на американското раководство е зголемен од 17 до 55 отсто во соседна Канада, а двојно е зголемен во Германија, во Италија, во Франција и во Јапонија.