Премиерот Андреј Пленковиќ е најнегативно оценет хрватски политичар во анкетата на „Промоција плус“, а во топ 3 се најде и првиот човек на Саборот, Гордан Јандроковиќ. Истражувањето покажало пораст на популарноста на новиот градоначалник на Загреб, Томислав Томашевиќ и политичката платформа „Можеме“, пад на рејтингот на претседателот Зоран Милановиќ и цврсто лидерство на ХДЗ.
Една година од последните парламентарни избори во Хрватска, ХДЗ е сè уште водечка политичка партија, а според резултатите од анкетата спроведена овој месец, неа ја поддржуваат 27,4 проценти од испитаниците, што покажува дека оваа партија има голема предност во однос на политичката конкуренција, пренесува загрепски „Јутарњи лист“.
На второ место и натаму е СДП со поддршка од 18,7 проценти, што е 0,2 отсто помалку отколку во јуни, но истражувањето покажува дека СДП сериозно се приближува кон коалицијата „Можеме“, која забележа зголемување на популарноста и поддршката од 16,9 проценти од испитаниците, односно 3,5 проценти повеќе отколку минатиот месец.
И покрај падот на рејтингот, Татковинското движење на Мирослав Шкоро се наоѓа на четвртото место, со поддршка од 6,4 проценти од испитаниците, што е 1,8 проценти помалку отколку во јуни, а „Мост“ е на петтото место со 4,8 проценти поддршка.