Апелацискиот суд Скопје соопшти дека изнесената жалба на адвокатот на бизнисменот Сеад Кочан, Никола Додевски, е делумно уважена.
Одлуката за притвор на кривичниот совет на Основниот суд Скопје, беше определна по три основи, а сега со решението на Апелација, се определува само по една точка – поради опасност од бегство, што значи дека Апелација го потврдува притворот за Кочан.
Експертите од судската фела појаснуваат дека тоа што жалбата е делумно уважена а притворот потврден по еден основ, за во иднина значи дека Кочан ќе може да понуди гаранција, финансиска или недвижнина, дека нема да бега од органите на прогонот.
Доколку Кривичниот совет на Апелацискиот суд го потврдеше решението за притвор по макар уште една основа, Кочан немаше да може да понуди гаранција.
Пред да ја објави одлуката, пред Апелациониот суд денеска протестираа вработени во фирмата на Кочан, „Трансмет“ кои бараа од судот да донесе ослободително решение.
Помеѓу демонстрантите освен вработените во фирмата на Кочан, беа и новинари од телевизија НОВА, како и припадници на Бошњачката заедница, за да го заштитат бизнисменот од институциите.
Кочан е првоосмничен во случајот „Труст“ на СЈО, и се сомничи за злоупотреба на службена положба во 2012 година кога бил управител на „Трансмет ДОО“ и со лажни документи добил тендер од ЕЛЕМ во вредност од 17 милиони евра.
Мерката притвор му беше одредена минатиот четврток, а истиот ден неколку часа претходно на Кочан му се губи трагата и не е достапен за истражните органи. МВР по него распиша потерница, додека адвокатот Додевски тврди дека е на службен пат.