Published: Thursday, March 20, 2025 11:25
Денес е најтажниот ден во историјата на Македонија. Најцрниот и најболен ден за Кочани. Ден на болка, ден на тишина, ден кога срцата се скршени, а солзите не престануваат да течат. Кочани остана без дел од својата младост, без својата иднина, без својата душа. Ова мало градче денеска тажи, секој граѓанин носи неизмерна болка, стои во објавата на Фејсбук профилот Кочани.
Тие велат дека ова не е трагедија само на едно семејство туку загуба за целиот град, целата земја.
Во овие моменти на жалост и тешка болка, апелираме покажете почит. Не објавувајте видеа, не споделувајте фотографии, не користете сензационални наслови. Болката на семејствата е доволно голема не ја зголемувајте со непромислени објави. Ова не е време за вести, ова не е време за љубопитност. Ова е време за тишина, за молитва, за достоинствено збогување, се апелира во нивната објава.
Тие во друга објава денеска напишаа и дека веќе кружат видеа од пред куќите на починатите, од нивните пријатели што со солзи ги подготвуваат за последното збогум.
Ова не е приказна за кликови, ова е човечка болка, пишуваат.
Тие замолуваат да не се споделуваат видеата и да се игнорираат текстовите што ја претвораат трагедијата во сензација.