Најпознатата македонска алпинистка, Илина Арсова која ги искачи сите највисоки врвови на седум континенти, деновиве се искачи на еден од највисоките и најтешките за освојување во Јужна Америка, врвот Arista Santa Barbara, 5.790 метри.
Во ексклузивната изјава за Нова ТВ директно од Еквадор, Арсова вели дека оригиналната идеја за главното искачување беше еден врв во Перу, но поради големиот избор, таа останала таму.
– Во Еквадор сум скоро дваесетина дена, каде дојдов заради алпинистички тренинг и искачување на вулканите во регионот. Оригиналната идеја за главното искачување беше еден врв во Перу, но изборот беше огромен и овде па затоа останав во Еквадор, вели Арсова.
Таа до сега со нејзините пријатели искачилс пет технички врвови со алпинистички пристап.
– Пичинча, јужниот врв на Илиница, Котопакси, кој ни послужи за аклиматизација пред најтешкото искачување завчера на врвовите Санта Барбара и Кајамбе преку алпинистичката насока на гребенот Санта Барбара. Значи за разлика од претходно, овојпат не ги одбиравме класичните патеки кои водат до врвот но различни линии со различна тежина што бара поинаков пристап и спремност, додава Арсова.
За разлика од другите планини каде до сeга најчесто планинарела, Арсова вели дека овде никаде нема поставено фиксни јажиња и се оди исклучиво во алпски стил.
– Еквадор го засакав уште во 2018 година кога престојував и волонтирав, а се претставив и со една изложба. Тогаш искачив неколку врвови во Перу, како и највисокиот вулкан во Еквадор, Чимборацо кој го искачив сосема сама, вели Арсова.
Инаку, Илина Арсова е првата Македонка и една од 60-те жени во светот која ги искачи највисоките седум врвови на сите седум континенти. За комплетирање на подвигот, таа кон крајот на 2019 година се искачи на врвот Винсон, кој со своите 4.892 метри е највисок врв на Антарктик.
Со надморската височина од 4.892 метри, Винсон е значително понизок од повеќето врвови на листата, но важи за најизолиран и најстуден.
Покрај Винсон, предизвикот „Седум врвови“ ги опфаќа и Монт Еверест (Азија, 8.848 метри), Аконкагва (Јужна Америка, 6.961 метар), Денали (Северна Америка, 6.194 метри), Килиманџаро (Африка, 5.895 метри), Елбрус (Европа, 5,642 метри) и Пунчак Џаја (Австралоазија, 4.884 метри). Според статистиките, повеќе од 400 луѓе биле на сите овие врвови.
Респектирачките алпинистички зафати по која е позната Илина влијаат и врз нејзината сликарска дејност.
Таа дипломира на ФЛУ во 2005 година, а ликовната уметност е нејзината првична професија. Има реализирано петнаесетина самостојни и уште многу групни изложби ширум светот: во САД, Канада, Еквадор (Ј. Америка), Сао Томе и Принцип (Африка), Малезија, Турција, Кина, Шведска, Германија и уште многу низ нашите краишта.
Идеен реализатор и креативен продуцент е на краткометражниот серијал „Ова е нејзината приказна“ во режија на Игор Христов, каде беа овековечени приказните на неколку балкански хероини од авантуристичките спортови.
Изложбата WHITE беше приказ на новосоздадени дела по инспиративниот престој на Антарктикот и комплетирање на мисијата „7 врвови на 7 континенти“ од првата Македонка и една меѓу 60 жени на светот.
Во нејзините храбри зафати беше и „Дневникот на моите височини“ , како што ги наслови своите алпинистички белешки, ликовни и запишани.