Грчкото Министерство за надворешни работи денеска преку соопштение реагираше на интервјуто на македонскиот претседател Ѓорѓе Иванов за грчкиот весник „То Вима“.
– Грчката Влада не е надлежна да му ги обезбеди потребните информации на претседателот на ПЈРМ. И секако не е одговорна за тоа што тој не е информиран за состојбата на односите меѓу двете држави, се наведува во кусото соопштение од портпаролот на Министерството Константинос Кутрас објавено „како одговор на новинарите“, не прецизирајќи притоа на кој дел од интервјуто се однесува.
Во интервјуто за То Вима, претседателот Иванов ги критикува грчките власти за „неодговорно однесување“ поради кое како што рекол „меѓусебната комуникација останува на недозволиво ниво“, притоа истакнувајќи дека до сега ниту еден грчки претседател не ја има прифатено неговата понуда за заедничка средба.