Руската атлетика останува под санкции. Ова го потврди Руне Андерсон, претседател на посебната комисијата при Интернационалната атлетска федерација (ИААФ), според кого е многу веројатно дека Светското првенство во Лондон од 4 до 13 август оваа година ќе мине без претставници од Русија.

Атлетскиот сојуз на Русија е под суспензија на неодредено време од ИААФ од ноември во 2015 година. Причина беше Светската анти-допинг агенција (ВАДА) која утврди дека руската држава спонзорирала масовна употреба на допинг средства.

Андерсон притоа истакна дека Русија мора да ги исполни барањата што се предочени пред да биде дозволено враќање на нејзините атлетичари на меѓународната сцена.

Поради казната од ИААФ, руските атлетичари се соочија со забрана за настап на Олимписките игри во Рио де Жанеиро минатата година и како што стојат работите ќе останат без учеството и на атлетскиот мундијал во Лондон.