Авион од Скопје со 157 патници од кои 24 позитивни на Ковид-19 слетал во саботата на аеродромот во Турку, Финска, тамошната министерка за семејни работи и социјални услуги, Криста Киуру. Тоа, според агенцијата „Ројтерс“ е причина за земјата на европскиот север да воведе задолжителни тестови за коронавирус и карантин за патници од држави со висок ризик.
Министерката Киуру информира дека на аеродромот во Турку во саботата било организирано доброволно тестирање на сите патници кои пристигнале со летот од Скопје, откако властите утврдиле дека два неодамнешни авионски летови од Северна Македонија и од Романија, се главни извори на нови инфекции со коронавирус во Финска.
Во иднина ќе биде задолжителен двонеделен карантин, а ќе се прават тестови за Ковид-19 за секој што ќе пристигне од земја во која има меѓу 8 и 10 позитивни случаи на вирусот на 100.000 жители во последните 14 дена.
Авиокомпаниите добија обврска да ги информираат патниците за задолжителното теститање по пристигнување во Финска. Непочитувањето, пак. на двонеделниот карантин ќе биде санкционирано со затвор до три месеци или парична казна.
Финска минатата недела имаше 2,3 заразени на 100.000 жители. Во земјата досега се евидентирани 7.600 позитивни на Ковид-19 и 333 смртни случаи.