Австралискиот премиер Скот Морисон денеска соопшти дека нема да разговара со францускиот претседател оваа недела во Обединетите нации, иако гневот на Франција поради откажувањето на одбранбениот договор тежок 40 милијарди долари може да го загрози трговскиот договор меѓу Австралија и Европската унија.
Австралија минатата недела го откажа договорот со француската поморска група за изградба на конвенционални подморници и наместо тоа ќе изгради најмалку осум подморници со нуклеарен погон со американска и британска технологија, по трилатералното безбедносно партнерство со двете земји.
Откажувањето на договорот ја налути Франција, која ги обвини Австралија и САД дека ја прободеле со нож во грбот и ги повлече своите амбасадори од Канбера и Вашингтон.
Додека американскиот претседател се обидуваше да разговара со францускиот претседател Емануел Макрон за да ги намали тензиите, Морисон рече дека нема да има одделни билатерални средби со францускиот лидер.
– Сега нема можност за тоа. Сигурен сум дека таква можност ќе се појави со време, изјави Морисон пред новинарите во Њујорк одговарајќи на прашањето дали ќе разговара со Макрон на маргините на Генералното собрание на Обединетите нации.