Претседателот на Стопанската комора на Северна Македонија Бранко Азески имал  средба со истакнати жени претприемачи, бизнис лидери, сопственици на компании членки на Комората. На средбата било разговарано за економската состојба за која оцениле дека е сложена, и дека бара итни мерки за нејзино надминување.

Размислувањата и предлозите на истакнатите жени претприемачи, менаџери на сериозни позиции во македонските компании е од особено значење во вака сложени услови на водење бизнис бидејќи потврдена е улогата и моќта на носење успешни одлуки од жените како бизнис лидери. Тоа го покажува и учеството на жените во структурите и формите на делување на Комората кои се присутни со над 25 отсто, и 65 отсто во апаратот на Комората, се вели во соопштението од Стопанската комора.

Во соопштението се додава дека Комората досега комуницирала со над 160 компании кои се жалат на проблеми поради драстичниот раст на цените на градежните материјали, неизвесноста околу енергенсите и друго, и бараат замрзнување или одлагање на каматните побарувања, укинување на сертификатите при влез во угостителските објекти, корекција на законот за недела неработен ден, и намалување на инспекциските контроли.