Стив Банон, досегашниот главен и контроверзен стратег на Доналд Трамп, ја напушти оваа функција. Но Банон не ја напушта борбата за конзервативна Америка а претседателот Трамп се уште е во неволји со скандалот што го предизвикаа неговите изјави за Шарлотсвил.
“Да нема забуна, дозволете да се дообјаснам: ја напуштам Белата куќа и тргнувам во војна за Трамп против неговите противници – на Капитол, во медиумите и меѓу корпоративна Америка”, изјави Банон во својот прв коментар, по неговото напуштање на функцијата како главен стратег во Белата куќа. Тој повторно ќе биде директор на екстремно-десниот сајт Брајтбарт.
Уште вчера, веднаш по заминувањето од Белата куќа, Банон го водел редакцискиот колегиум на сајтот и новинарите ги повикал да ги засукаат ракавите и да работат на афирмирање на конзервативната кауза.
“Го менувам името во Стив Канон (топ). Војната е во тек!”, напиша денес Стив Банон на Твитер.
Реакции
“Отпуштањето на Банон е добредојдено, но тоа не може да ја скрие позицијата на Трамп за белите нео-нацисти и нетолеранцијата која тие ја застапуваат”, реагираше Ненси Пелози, шеф на демократите во парламентот.
Реакциите дојдоа и од републиканска страна. Мит Ромни, поранешен кандидат за претседател, смета дека ова се важни моменти за Трамп и побара од него да и се извини на јавноста поради тоа што тој стави знак на равенство помеѓу нео-нацистите и анти-расистите. Тој го обвини Трамп дека ги охрабрува расистите и ги фрла во очај сите малцинства во САД.
Дури и шефот на американската дипломатија Рекс Тилерсон го критикуваше Трамп со тоа што јасно го осуди расизмот: “Омразата не е американска вредност”, рече тој.
Неколку газди на големи фирми исто така му го свртеа грбот на Трамп а вчера тоа го направи и Руперт Мардок, газда на голема медиумска империја во која припаѓа и ТВ Фокс Њјуз и близок пријател на Трамп. Тој рече дека реториката на Трамп носи омраза и додаде дека не сака да биде соучесник во тоа.
Мајката на Хитер Хејер, жената која загина во насилството во Шарлотсвил од еден нео-нацист, одби да се види со Трамп кој сакаше да и изрази сочувство за загубата на ќерката.
Хаос во Белата куќа
Од Белата куќа заминаа и Шон Спајсер, портпаролот на Трамп и Ренс Прибус, генерален секретар на претседателството. Со заминувањето на Банон екипата на Трамп се реформира по критиките дека во Белата куќа владе хаос. Џон Кели, новиот генерален секретар, се стреми да воведе ред во тој хаос па се шпекулира дека тој стои зад оставката на Банон.
Банон е газда на сајтот на американската екстремна десница Брајтбарт, десница која се претставува со името алт-рајт (алтернативна десница). Тој во една прилика изјави во Њујорк Тајмс дека медиумите не ја познаваат земјата, дека треба да се чувствуваат «понижени» и дека треба да молчат.