Првото издание на реформираниот Дејвис Куп што од оваа година ќе се организира како еднонеделно Светско првенство го доби комплетниот список на учеснички. Дванаесет тима се пробија преку баражите пришто најдраматично беше во Ташкент (Узбекистан – Србија), во Братислава (Словачка – Канада) и во Гвангжу (Кина – Јапонија). Сите три пресметки беа решени во пет меча и во сите се радуваа гостинските селекции.
Филип Краиновиќ ја оствари одлучувачката победа за Србија за триумф над Узбекистан со 3:2. Во петтиот меч од судирот беше подобар од Санџар Фајзиев со 4:6, 6:3, 6:0.
Денис Шаповалов и Феликс Огер Алиасиме беа творци на пресвртот на Канаѓаните над Словачка за конечни 3:2. Шаповалов во два сета бепе подобар од Мартин Клижан (7:6, 6:4), а Алиасиме приреди изненадување со победата над Гомбош со 6:3, 6:4.
Јапонија го слави Таро Даниел. Моментно 69. светски рекет славеше над Ли Же со 6.3, 6:7, 6:3 и ги поведе „самураите“ кон завршниот турнир.
Освен Србија, Канада и Јапонија, победнички бараж имаа и селекциите на Австралија, Белгија, Чиле, Колумбија, Германија, Италија, Казахстан, Холандија и Русија кои осигураа место на мундијалот во Мадрид од 18 до 24 ноември. По автоматизам, како лански полуфиналисти, на СП ќе играат и Хрватска како бранител на титулата, Франција како финалист и САД и Шпанија кои беа елиминирани во полуфиналето во 2018 година, а двете вајлд карти од организаторот беа адресирани до Велика Британија и Аргентина.
Изгледот на групите (шест по три репрезентации) ќе биде познат на 14 февруари за кога е закажано извлекувањето во Мадрид. Првопласираните од секоја конкуренција плус двете најдобро второпласирани состави ќе продолжат во четврт-финале.
Баражи за тениското СП 2019 во Мадрид
Бразил – Белгија 1:3
Узбекистан – Србија 2:3
Австралија – БиХ 4:0
Индија – Италија 1:3
Германија – Унгарија 5:0
Швајцарија – Русија 1:3
Казахстан – Португалија 3:1
Чешка – Холандија 1:3
Колумбија – Шведска 4:0
Австрија – Чиле 2:3
Словачка – Канада 2:3
Кина – Јапонија 2:3