Барселона ќе биде принудена да одлучи во која фудбалска лига ќе настапува ако Каталонија стане независна република, изјави претседателот на клубот Жозеп Бартомеу.
„Ако добиеме независност, клубот и неговите членови ќе мора да одлучат во која лига ќе играме“, изјави тој.
Како што вели клупскиот претседател, клубот минува низ тежок и комплициран период бидејќи не знае што ќе се случува, но порача дека секоја одлука ќе биде донесена смирено и мудро.
Министерот за спорт на Каталонија, Џерар Фигерас, минатата недела изјави дека Барселона ќе може да настапува во друга држава ако добијат независност.
„Ако добиеме независност, каталонските тимови во Ла Лига: Барселона, Еспањол и Жирона ќе одлучат каде ќе играат, дали во Шпанија дали во Италија, Франција или Англиската Премиер лига“, рече тој.
На 1.октомври, на денот на гласањето за независност во Каталонија, шпанската Ла Лига не дозволи мечот меѓу Барселона и Лас Палмас да биде одложен, по што натпреварот се одигра без присуство на публика.
За време на рефенредум при нападот на шпанската национална гарда врз граѓаните, повредени беа над 800 луѓе.
Во меѓувреме, еден од најпознатите Каталонци, дефанзивецот на Барселона, Жерар Пике, кој јавно кажа дека гласал за независност, беше исвиркан за време на тренингот на фудбалската репрезентација на Шпанија, каде се појави прв пат после референдумот.
Пике неодамна рече дека ако челниците на шпанската фудбалска федерација или навивачите, не го сакаат во шпанскиот дрес, тој е подготвен да се откаже и да стави крај на патувањето во кое до сега забележа 91 настап за репрезентацијата.