Валенсија го совлада Реал Мадрид со 2:1 во натпревар од 23. коло во шпанската Примера. Популарните „лилјаци“ важат за традиционално тежок противник за „кралскиот“ клуб, а како такви се потврдија и вечерва на „Месталја“ на задоволство на сопствените навивачи и особено на фановите на Барселона.
Симоне Заза погоди уште во четвртата минута за водство на Валенсија. Само четири минути подоцна следуваше нов студен туш за гостите од Мадрид преку Орелјана за 2:0. Домашните до одморот не реализираа и одлична прилика за трет гол, а на минута пред крај на првиот дел Кристијано Роналдо намали на 2:1.
И покрај теренската доминација на мадриѓани во вториот дел, сепак, бројките на семафорот останаа непроменети. Валенсија одлично одолеваше на гостинските напади и успеа да ја одбрани предноста од полувремето за голема услуга на Барселона која се враќа во борба за шампионската титула иако Реал М. треба да одигра уште еден заостанат меч.
Реал М. останува лидер на табелата со бод повеќе од Каталонците. Трета е Севилја, а четврти Атлетико Мадрид.