Новак Ѓоковиќ и Борис Бекер ја прекинаа тригодишната соработка. Србинот ја образложи одлуката за разделба со „исполнување на сите цели“, Германецот се „заблагодари што бил негов тренер“. Веста за разединувањето на актуелната и поранешната тениска ѕвезда беше ударна вчеравечер. Потисна се што беше спортско на глобален план, во втор ред ги фрли и натпреварите од шестото, последно, коло во фудбалската Лига на шампиони.
Медиумите тргнаа по причините за прекинот. Се прават анализи, се влечат паралели, се пишува хронолошки од декември во 2013 кога Бекер влезе во стручниот штаб на Србинот до овој во 2016 година во кој излегува. Во многу од нив се провлекува Пепе Имаз, шпанскиот гуру, кој во последните три-четири месеци беше се поприсутен во јавноста, во боксот на Ѓоковиќ на трибините при настапи на турнирите. Ангажиран беше за враќање на внатрешниот мир, за засилување на менталната сила и неговата се понагласена улога, методи на работа и „љубов и мир“ филозофија, се чини, не беа во дотолку во насока на размислувањата на Германецот.
Ѓоковиќ знаеше што и колку му пречи на Бекер, Бекер, пак, знаеше што и колку му е важно на Ѓоковиќ во врска со работата на Имаз. Германскиот тренер, чија цена на пазарот е енормно зголемена по работата во минатите три години, 25 победи вклучувајќи и шест гренслема, ја отвори душата по неколку прашања за искуството што го имаше со моментно вториот светски рекет. Се размина пријателски, најави дека ќе биде негов најголем навивач во 2017 година и оти верува дека ќе се врати на првото место на АТП листата.
„Уверен сум дека го боли губењето на лидерската позиција од Енди Мареј. Знам дека го болеше и поразот од Вавринка во финалето на Ју-Ес опен. Но, тоа, на некој симпатичен начин, мислам дека и му требаше за да почувствува како е да губи мечеви бидејќи немаше пораз две ипол години. Убеден сум дека ќе се врати на првото место на АТП листата и ќе потврди дека е најдоминантен играч во овој спорт. Ќе бидам најголем негов навивач во 2017 година“, рече Бекер.
Ѓоковиќ мора да се врати на работа во својата „канцеларија“
Бекер зборуваше и за подемите и за падовите и за победите и за поразите. Можеби, вели, „има еден или два што сакате со задоволството да ги „избришете“, што не сакате да ве потсетуваат и да се навраќате на нив“, но авантурата што ја имал со работата со Ѓоковиќ е неверојатно искуство за него. Поотворено се осврна на тренинзите во последните шест месеци на кои српскиот тенисер не работел многу.
„Мислам дека во минатите шест месеци беа голем предизвик на многу нивоа. Рацете ни беа помалку „врзани“ бидејќи не можевме да работиме како што сакавме. Новак не работеше многу на терените за тренинг во минатите шест месеци. Не толку колку што требаше. И самиот свесен за тоа. Успесите како неговиот не доаѓаат со притискање на копче, не се доаѓа до нив со самото појавување на турнири. Потребна е напорна подготовка бидејќи и противниците го прават истото“ коментира Бекер и додава:
„Затоа Ѓоковиќ мора да се врати на тренинзите, во таа негова „канцеларија“, да мине часови во неа о психолошки да се врати таму каде и настана таа негова тениска сила“.
„Немал проблеми во бракот“
Бекер проговори и за шпекулациите во приватниот живот на Ѓоковиќ, за пишувањата за евентуални проблеми во бракот како една од причините за падот на неговата форма. Притоа нагласи, колку што му е познато, дека немал недоразбирања со најблиските, но се осврна и на природата на тенисот што го опиша како „работа што ги одвојува луѓето од семејството“.
„Не знам дека имал какви било проблеми. Барем од она што ми е мене познато. Среќно е оженет и има пресладок син. Професијата на тенисерот, веројатно, е најсебична во спортот бидејќи во неа станува збор токму за вас. Ѓоковиќ секогаш ќе ви каже дека е семеен човек, но сопругата и семејството во овој спорт секогаш се наоѓаат на задното седиште во тоа патешествие. Таа состојба не може да трае вечно. Имав прилика да ја запознам неговата жена. Таа е навистина љубезна и го поддржува својот сопруг. Но, не можат да минат многу време заедно. И мене ми се случуваше тоа пред 20 години. Тоа е природа на овој спорт кога сте звер тенисер“, заклучи Бекер.