Со државна мобилна лабораторија почнуваат засилени контроли на квалитетот на горивата во земјава. Државниот пазарен инспекторат од денеска започнува со вонредни контроли и на течните деривати и тоа при влезот во државата и во малопродажбата, изјави денеска на прес конференција министерот за економија, Крешник Бектеши
Тој нагласи дека целта е да се заштитат потрошувачите од можни манипулации, но и да се заштити животната средина, а дека проверките на терен покажале нерегуларности при увозот на мазут во земјава, но целосниот извештај ќе биде презентиран во вторник.
– Како што најавивме, во моментот, заедно со вицепремиерот Николовски ги собираме сите информации за дистрибуција на сомнителен мазут. Крајниот рок кој им го дадовме на институциите е следниот вторник кога очекуваме дека ќе ги имаме сите информации за евентуалните злоупотреби на увоз на опасен мазут во нашата земја. Доколку не се реализирани сите процедури согласно правилникот за квалитет на течни горива и процедурите за увоз на нафтени деривати, документите ќе им ги предадеме на Јавното обвинителство, рече Бектеши.
Тој рече и дека мобилната лабораторија две години не се користела.
Од ДПИ информираат дека денеска биле извршени три вонредни инспекциски надзори на бензинските станици, но не обелоденија во кои. Најавуваат дека контролата ќе продолжи.
– Денешните надзори се само почеток на вонредни инспекциски надзори и ќе бидат дел од приоритетите на нашата работа во наредниот период и ќе бидат спроведени на територијата на целата држава. Вршењето на инспекциските надзори од страна на инспекторите се во насока на контрола на квалитетот на горивата односно моторниот бензин и дизел горивото за што Мобилната лабораторија е акредитирана. Анализите се однесуваат на својствата на горивата пропишани со правилникот. Во план е овие контроли со мобилната лабораторија и во соработка со ЦУ да се вршат на влез на горивата во нашата држава, односно на нашата граница со цел да спречиме влез на несоодветен квалитет на горива во внатрешниот пазар, рече в.д. директорката на Државниот пазарен инспекторат, Анета Симеска Димоска.
Таа нагласи дека ДПИ, заедно со инспекторите, и таа како в.д. директор на овој инспекторат, максимално ќе се посветат на работата, а граѓаните со сигурност ќе можат да сметаат дека квалитетот на горивата ќе биде безбеден.