Неколку минути пред 22 часот, студентите го објавија крајот на нивниот дотогаш мирен протест порачувајќи дека ова е крај на предавничката влада.
Студентката, чие име не беше споменато, од говорницата рече дека владата од денес се смета за нелегитимна. Таа побара свикување и одржување на „фер предвремени парламентарни избори“.
Не молчевме пред странските агресори или домашните предавници. Србија нема да биде подобра без вас. Владата ве исклучи од политиката и никогаш не ве праша дали сте задоволни од животот во Србија. Додека владата ги разединуваше и ги принудуваше работниците на своите состаноци, ние ја подадовме раката и ги слушавме вашите проблеми. Движењето започна со четири барања, но стана глас на сите обесправени. Само замената на луѓето не е доволна. Предлагаме општествен договор, да се вратат институциите во служба на граѓаните.
По официјалното завршување на собирот избувнаа судири на групи протестанти со полицијата.
Еден час пред официјалниот крај на протестот, полицијата постави кордони околу владините згради и седиштето на претседателот на Републиката, а околу 22 часот почна да ги собира демонстрантите. Некои од демонстрантите ги покрија лицата со маички, а полицискиот кордон се движеше кон толпата. Најтензична ситуација беше забележана кај Турската амбасада, каде што беа фрлани факели.
Полициските кордони се обидоа да ги истиснат граѓаните од улиците каде што се одржуваше протестот, некои од нив се спротивставија, поставија контејнери за отпад како барикади и фрлаа разни тврди предмети кон полицајците, кои употребија и солзавец. Еден од полициските команданти им се обрати на демонстрантите со мегафон: „Распуштете се што е можно поскоро“.
Полицијата ги предупреди граѓаните, но потоа мораше да интервенира бидејќи беа нападнати, соопшти директорот на полицијата Драган Васиљевиќ. Директорот на полицијата рече дека шест полицајци и двајца граѓани се повредени, а „одреден број хулигани се приведени“.
Вучиќ во Чациланд, даде изјава но Претседателот на Србија, Александар Вучиќ, претходно изјави дека „очекува насилство“, велејќи дека е „невозможно некој да инвестира огромни пари против една земја без барем да проба нешто“. Тој додаде дека „земјата ќе победи“.
Околу 19.30 часот во саботата, Вучиќ објави фотографија од себе како игра шах на Инстаграм, а потоа се упати кон своите поддржувачи кои живеат во шаторски камп во паркот Пионирски од април. Тој најави јавно обраќање за денеска во 11 часот.
Еве ме тука во Пионирски парк, или како што сакаме да го наречеме – Чациланд. Тука сум со овие прекрасни млади луѓе кои само сакаат да учат, а сега разбираат дека конечно победиле. Сега тие разбираат дека сè се враќа на свое место, не само затоа што блокадите имаа три пати помалку луѓе отколку на 15 март, туку затоа што веруваат во својата борба. Тие веруваат во правдата, вистината и нивните идеали. Нема ништо посилно од идеалите. Идеалите се цврсти и силни како Манасија, како Раваница, како тврдината Петроварадин… како сите наши најубави градови и села. Дали ќе има насилство вечерва или не, не зависи од овие млади луѓе овде. Ви благодарам многу и да живее Србија, заклучи Вучиќ.
По двочасовна интервенција и туркање на демонстрантите од центарот на градот, ситуацијата во српската престолнина постепено се смири, но некои улици останаа затворени за сообраќај. Владата ги нарекува масовните антивладини протести предводени од студентите по трагедијата во Нови Сад на 1. ноември минатата година „шарена револуција“.