Пред српското Министерство за образование во Белград се одржа протест на просветните работници од основните, средните училишта и од Универзитетот под мотото „Вие сте одговорни! Од вас зависи“.
Демонстрантите ги прочитаа и барањата на основните и средните училишта. Првото барање на основните училишта е да престанат притисоците и заканите кон просветните работници, како и да се повлечат сите мерки против наставниците кои штрајкуваат. Второто барање е итна примена на протоколот од 2023 година, кој се однесува на материјалната состојба на вработените. Третото барање е да се намали „непотребното административно работење во корист на образованието, а четвртото барање се однесува на измени на спорните членови од колективниот договор. Тие бараат и утврдување на репрезентативноста на Синдикатот, како и измени на Законот за основите на образовниот систем.
И средните училишта бараат итно прекинување на репресивните мерки против вработените во училиштата поради прекинот на работата. Бараат и измени и дополнувања на спорните членови од колективниот договор потпишан во 2025 година, потпишан, според нив од нерепрезентативните синдикати. Третото барање се однесува на деполитизација на Министерството за образование и избор на министри според професионалните надлежности. Исто така бараат и значително подобрување на материјалната положба на наставниот и ненаставниот кадар во образованието, како и воспоставување на репрезентативност на синдикатите.
На протестот пред Министерството за образование, просветните работници прочитаа заедничко соопштение во кое потенцираа дека главната одговорност за моменталната состојба во образованието е на ресорното министерство..
Во меѓувреме, студентите од различни градови на Србија тргнаа во уште еден марш кон Ниш, каде на 1 март ќе се одржи 18-часовен протест поради падот на настрешницата на Железничката станица во Нови Сад, при што загинаа 15 луѓе, меѓу кои и македонскиот државјанин Васко Саздовски.