Крилото на движењето Беса што го предводи Билал Касами ги прекина преговорите со премиерот Зоран Заев, за евентуално приклучување кон владината коалиција и најави дека останува конструктивна опозиција.

-Бидеќи овој процес на преговори трае повеќе од четири месеци без некој конкретен епилог, цениме дека се поминати сите временски лимити и несакајќи Движењето Беса да биде заложник на техничките калкулации на парламентарното мнозинство, од денеска ги прекинуваме сите разговори со премиерот на државата во делот на вклучување на Движењето Беса во Владата, се вели во соопштението.

-Процесот на зголемување на парламентарното мнозинство Движењето Беса не го сфати како технички процес само за обезбедување на бројка во Собранието, туку како квалитативен процес со кој преку присуството на Движењето Беса ќе се видеше и разликата во менаџирањето во Владата. Но изгледа овој коректен пристап на Движењето Беса не го сфатил премиерот Заев кој за жал преку опцијата за „купување„ време се обидува политички да ги ослаби сите страни што се вклучени во преговорите за влез во владата, обвинуваат од ова крило.

Од Беса на Касами, како втора причина што не сакаат натаму да преговараат за владина коалиција, е разочараноста што Заев не започнал, како што велат, „да се ослободува од ДУИ како дел од поранешниот режим на Никола Груевски“, на што се надевале.

– Гледајќи ги субјектите кој секојдневно му се приклучуват на преговорите за ширење на парламентарното мнозинство, сега не само ДУИ туку и други елементи што биле дел од режимот на Груевски, вклучувајќи и тие што се директни актери за немилите настани на 27 април минатата година, се гледа како пуштаат длабоки корени во ова влада што полека го губи и епитетот на реформска влада, сметаат од Беса на Касами.

Од ова крило сепак најавуваат дека како опозиција, ќе бидат конструктивни, ќе алармираат за секоја политичка грешка на владата, но истовремено ќе иницираат и ќе поддржуваат секаква реформа што ќе го подобри животниот стандард на граѓаните, демократизација на државата, владеење на правото, правото на слобода на говор и интегрирање на Македонија во НАТО и ЕУ.

Претходно генералниот секретар на ова крило на Беса, Аријанит Хоџа во изјава за Плусинфо рече дека прекинот е поради несериозниот однос на премиерот Зоран Заев и според нив, ова е уште една потврда дека на Владата и се поважни технички наместо суштински промени.