Со 1,6 милиони долари досега се изготвени 58 квалитетни технички документации за проекти во 47 општини и два регионални центра. Сите овие проекти се подготвени за реализација, а за нивно финансирање ќе бидат потребни 126 милиони долари, рече денеска вицепремиерот за економски прашања Фатмир Битиќи на „Тркалезната маса за финансирање инфраструктурни инвестиции за одржлив локален развој и економско закрепнување“.
Проектите, напомена Битиќи, ќе придонесат за подобар живот на граѓаните, а додадена вредност е што се зајакуваат капацитетите на локалните самоуправи.
Идејата за проектот потекна од централанта власт која препозна недостиг на квалитетни технички документации на локално ниво. Мора да се посветиме на проекти за реалните потреби на граѓаните и тука нема компромис. Ваквиот тип структурна поддршка со која е подготвувана квалитетна техничка документација, се надевам дека ќе мобилизира повеќе инвестиции, нагласи вицепремиерот.
Тој подвлече дека останува владиниот приоритет за рамномерен регионален развој поради што продолжува изготувување и спроведувањето проекти за подобрување на патната и железничката инфраструкутра, водоводи и канализации, градинки, училишта, амбуланти, итн.
Битиќи најави и дека првпат ќе се формира централна единица за мониторинг и спроведување капитални проекти која ќе гарантира нивно ефикасно спроведување.
Шведската амбасадорка во земјава Кристин Форсгрен Бенгтсон ги поздрави ваквите заложби, нагласувајќи дека во Шведска се нагласува потребата од зелени инвестици.
Кога видов кои проекти се поддржани, ми беше мило дека се многу различни, и во делот на физичката инфраструктура како патишта, транспорт, но има и инвестици од социјален аспект: училишта, градинки, амбуланти. Во Шведска ја нагласуваме потребата од зелени инвестици и енергетски ефикасни решенија како кај згради или еколошки извори на енергија, рече Форсгрен Бенгтсон.
Амбасадорката информира и дека шведската Влада усвои долгорочна седумгодишна стратегија, до 2027 година, особено за Западен Балкан и Турција, во која е опфатена и Северна Македонија.
Шведска верува дека локалниот развој е клучен фактор за економски раст. Ќе продолжиме да соработуваме со државите во регионот, потенцира Форсгрен Бенгтсон.
На конференцијата се обрати и постојаниот претставник на УНДП во Скопје, Армен Григорјан кој истакна дека инвестициите во инфраструктурата се клучни за локален економски развој.