Заменик-претседателот на Владата, задолжен за економски прашања, координација на економските ресори и инвестиции, Фатмир Битиќи, престојува во Вашингтон каде денеска и утре ќе оствари низа средби.
Како што е најавено од владината прес-служба, вицепремиерот Битиќи денеска ќе оствари средба со извршниот директор на Меѓународниот монетарен фонд, Пол Гилберс, а потоа во текот на денот ќе се сретне и со извршниот директор на Светска Банка, Кун Дејвидсе.
Во Департментот за финансии на САД, вицепремиерот Битиќи ќе оствари средба и со Брајан Мекколи, заменик помошник секретар за Европа и Евроазија и Ендру Феир, помошник секретар за безбедност на инвестиции во Департментот за финансии.
На денешната агендата на вицепремиерот Битиќи е и средбата со Џафри Пајат, помошник државен секретар за енергетски ресурси во американскиот Стејт департмент.
Во вторник, најавен е состанок на вицепремиерот Битиќи со претставници од ACEBA, Американско – Централноевропската бизнис асоцијација и средбата со Дејвид ДеФалко, заменик помошник секретар за Европа и Евроазија во Департментот за трговија.